Jon 3 | PMA | STEP | Iahova selus eris min Siona vit,

Jonah 3

Siona Long Kat Iahova ka Va Sel Kat Meatin Keil ten out Nineva

Siona 3:1-10

1 Iahova selus eris min Siona vit, 2 “Kiha en mari taon ten out Nineva, ka kihit meseni min keil selusien koa nisani minuk.” 3 Sakini Siona long kat Iahova ka va en out Nineva. Taon ten out Nineva marite mok. Munak meatin mul en usite tai ka vit vaha en usite sav tamun, houal avong hetel varei. 4 Sakini, Siona va en taon enek ka mual ien avong tas. Evus, navong mul luhu en mari taon enek, kei visohiso va min meatin keil vit, “Avong hanumau elu (40) sesuk keke Ahi hou ralisin mari taon ekek ten out Nineva.”

5 Navong meatin keil ten out Nineva alonge mukok, akul anatin en selusien onen Iahova. Sakini avitehiteni min meatin keil vasi, koakeil avi hetetamen vita rokol koakeil avi havivi, keke ihal ran anien ka isin en musi eisin keil vatie lati keke alonge tisa ven tisaen keil one.

6 Navong asuv houlu ten out Nineva kur longlongien usil asa koa Siona vitehiteni, kei mun longe tisa. Sakini mea ran vulin ten keihoen ka kulat more eisin omon. Evus, musin en musi eisin keil ka va rondan en vuli meas. 7 Evus, meng kati keke avatis mengkatien tai vaha min me-Nineva keil vasi avousili. Mengkatien enek vit:

“Koanek vi mengkatien onen asuv houlu ka hetetamen keil onen. Meatin keil vasi ka tirendan ose keil emun anat vistei anien ka anamuntei oei.

8 Meatin keil ka tirendan keil emun isin en musi eisin keil ka ipeah Ahi keke enhemahis keil. Keil ihiles ran huhuen keil one ka sakien tisa sav keil koa amumoni. 9 Munak rehoumoni hemukonek, vahesa Ahi hersantei mun mahien hemai enir. Vahesa kei hehiles rendemien onen ka hermu vinitei ir hetal min vurohien takeih onen.”

10 Navong Ahi les asa koa amumoni, ka lesi keke aviles ran sakien tatisa keil one, kei viles rendemien onen ka rosantei mun mahien vasuval koa kei viteni.